உலக சுகாதார நிறுவன கணக்குப்படி இந்தியாவில் ஆயிரம் பேருக்கு ஒரு மருத்துவர் கூட இல்லை: மக்களவையில் அமைச்சர் தகவல்

‘‘இந்தியாவில் ஆயிரம் பேருக்கு ஒரு மருத்துவர் என்ற எண்ணிக்கையை விட குறைவாக உள்ளனர்’’ என்று மக்களவையில் சுகாதாரத் துறை இணை அமைச்சர் தெரிவித்தார்.

மக்களவையில் நேற்று கேள்வி நேரத்தின் போது சுகாதாரத்

துறை இணை அமைச்சர் அனுப்பிரியா படேல் பதில் அளிக்கையில் கூறியதாவது:

ஆயிரம் பேருக்கு ஒரு மருத்துவர் என்று உலக சுகாதார நிறுவனம் நிர்ணயித்துள்ளது. இந்திய மருத்துவக் கவுன்சில் அளித்துள்ள தகவலில், நாட்டில் கடந்த மார்ச் மாதம் 31-ம் தேதி நிலவரப்படி மாநில மருத்துவக் கவுன்சில் அல்லது இந்திய மருத்துவக் கவுன்சிலில் 10 லட்சத்து 22 ஆயிரத்து 859 அலோபதி மருத்துவர்கள்தான் பதிவு செய்துள்ளனர் என்று தெரிய வந்துள்ளது. இந்த எண்ணிக்கை இந்திய மக்கள்தொகையில் ஆயிரம் பேருக்கு ஒருவர் என்ற எண்ணிக்கையை விடவும் குறைவாகவே மருத்துவர்கள் உள்ளனர். இந்திய மக்கள்தொகை தற்போது 1.33 பில்லியனாக உள்ளது. இந்த எண்ணிக்கையில் ஆயிரம் பேருக்கு 0.62 என்ற சராசரியில்தான் மருத்துவர் எண்ணிக்கை உள்ளது.

எனவே, மருத்துவர் எண்ணிக்கையை அதிகரிக்க மத்திய அரசு நடவடிக்கை எடுத்து வருகிறது. நாட்டில் தற்போது 479 மருத்துவக் கல்லூரிகள் உள்ளன. இவற்றில் ஆண்டுக்கு 67,218 எம்பிபிஎஸ் மாணவர்கள் சேர்க்கப்படுகின்றனர். இதில் கடந்த 3 ஆண்டுகளில் மட்டும் 12,870 இடங்கள் கூடுதலாக சேர்க் கப்பட்டது குறிப்பிடத்தக்கது.

இவ்வாறு இணை அமைச்சர் அனுப்பிரியா கூறினார்.